[forum-loriku] Re: PUBLICO-Língua portuguesa é "um símbolo de resistência" de Timor-Leste

From: "José" Pereira <maubere_oan@yahoo.com>

Date: 15 December 2006 2:07:02 AM

Subject: Re: [forum-loriku] PUBLICO-Língua portuguesa é "um símbolo de resistência" de Timor-Leste

Loron kmanek ba belun sira hotu,

 

 

Ba hau nia belun Marciano, uluk nanain hau ata hakarak hatoo hau nia obrigadu barak ba ita boot nia hanoin nebe hatoo konaba ba hau nia hakerek iha haksesuk fatin hirak nee. Hau ata mos hakruk ba ita boot nia hare no hanoin nee.

 

Diak, dala barak ona mak hau hare belun barak mak kahur tun sae buat rua nebe la hanesan ba fatin ida deit no ba buat ida deit. Wainhira ita koalia konaba liafuan Portuges no ba Timor Lorosae, ita tenke haketak buat rua nee:

 

 

1. Atu hanorin liafuan ida Portuges nee iha eskola sira iha Timor Lorosae,

 

2. Atu foti liafuan ida Portuges nee nudar "IDENTIDADE" no "SÍMBOLO de RESISTÊNCIA" Timor Lorosae nian

 

Buat atu hanorin liafuan ida nee iha eskola sira hotu iha Timor Lorosae nia laran tomak ba hau la iha lia ka problema ida. Sei diak liu tan wainhira ema Timor oan barak liu mak hatene liafuan ema husi rai seluk nian, laos portuges deit. Ita bele foti liafuan hot-hotu iha rai tomak hodi tau iha eskola hot-hotu atu ema Timor oan sira buka hatene. Ema Timor oan ida bele koalia too liafuan atus ida (100) resin, naran katak nia bele atu hatene liafuan hirak nee, la iha ema ida atu hakaas nia ka tahan netik nia atu nia buka hatene liafuan hirak nee. Ema ida-idak hili tuir nia hakarak no bele. Timor oan barak liu tan mak hatene liafuan hirak nee, sei sai diak liu tan ba Timor Lorosae. Hanesan hau nia belun Marciano bele hili no buka hatene liafuan tomak iha mundu nee, sei la iha ema ida atu tahan netik. Hau nudar Timor oan ida, hau sei haksolok teb-tebes wainhira iha ema Timor oan ida mak bele koalia liafuan hot-hotu husi ema hot-hotu nian iha mundu nee.

 

Maibe wainhira ita temi konaba buat ida "IDENTIDADE" no "SÍMBOLO de RESISTÊNCIA", nee ketak ona, la hanesan buat ida atu hanorin Portuges, Ingles ka Indonesia, hsst. iha eskola. Buat ida "IDENTIDADE" nee kait ona ho "BUAT FOLIN KULTURA NIAN (VALORES CULTURAIS)" nebe hari "EMA (POVO) no RAIN (NAÇÃO) ida no hodi haketak nia husi Ema no Rain sira seluk. Katak liu husi "Buat Folin" hirak nee, ita bele hatene no haketak Ema no Rain ida nee husi Ema no Rain sel-seluk iha mundu nee. Hanesan hau hateten tiha ona dala barak katak buat ida "IDENTIDADE" nee hanesan ita nia lalatak rasik. Wainhira ema ida hateke ka hare ba ita nia lalatak nee, nia sei hatene katak nee ita mak nee, tamba ita ho ita nia lalatak nee hanesan deit no ida deit. Ita boot hanoin tok ka koko tok deit hanesan nee; ita boot foti malae portuges ida nia lalatak tau iha ita boot nia "KTP (Bilhete de Identidade) ka tau iha kartera laran, wainhira ema ida hetan ka hare nia sei husu, "eh malae nee se los no mai husi nebe?" Nia sei la dehan " ai o nia lalatak nee kmanek los, o hasai iha nebe?" Tamba lalatak nee la hanesan ho ita boot, nia ketak los. Wainhira nia husu katak ; malae nee se los no mai husi nebe? No ita boot dehan ba nia "nee hau sa !". Ema ida nee bele la toman hamanasa husi nia moris mai, maibe iha loron ida nee nia sei hamanasa wainhira nia rona ita boot dehan katak lalatak ida nee ita boot nian. Wainhira nia ema bulak ka bilan ida karik, nia kal sei la hamanasa no fiar ita boot.

 

Neduni wainhira ita foti liafuan ida nee sai nudar ita nia "IDENTIDADE" nee katak ita foti fali malae ida nia lalatak hodi tau fali iha ita nia KTP hodi dehan katak nee ita mak nee. Halo nusa mak ita bele "identifica"ita nia an ho ema seluk nia lalatak? Ita "identifica" ita nia Ema no Rain ho ema seluk nia kultura? Ita nia lalatak rasik kal laiha ka? Ita nia Ema no Rain kal laiha kultura rasik ka? Ita nee kal fuik hanesan lekirauk sira nebe ema foin kaer mai hodi hamaus, neebe la iha kultura rasik?

 

At liu tan, ita dehan katak liafuan ida nee hanesan "SÍMBOLO DE RESISTÊNCIA" Timor Lorosae nian. Se hanesan nee, kal Timor oan ida rua nebe hatene tun sae portuges nee mak mesak halo funu. Ema sira nebe la hatene portuges kal lor-loron kee fehuk no han fehuk deit, neebe sira sai tiha maufehuk hotu…hahaha…!

 

Hau ho hau nia belun sira nebe uluk halo buat ida "kalendistina" nee ami koalia deit ho Tetun. No wainhira ami ba hasoru malu ho belun Falintil sira iha ai-laran mos ami koalia ho Tetun deit. Uluk be maun boot Konis Santa iha Liquisa neba, hau hare foin sae, ferik katuas sira nebe ba hasoru malu ho nia, Koalia Tetun deit. Hau la rona ema sira nee koalia portuges musan oan ida. Ita la bele sukat fali wainhira ita hakerek surat rohan ida ba ema seluk iha rai liur neba ho portuges, ita dehan ona katak ita halo funu ho liafuan ida nee. Ita hakerek ba nia ho portuges tamba ema nee la hatene Tetun, hanesan mos ba ema nebe hatene Ingles, ita hakerek ho Ingles, hsst. Wainhira ita hakerek ba ema Timor oan ida mak ho portuges nee tamba ita mak hakarak hatudu an dehan katak ita nee hatene portuges. Ita dehan, lae ita hakerek hanesan nee atu ema Indonésia la bele hatene, nee bosok, tamba ema Indonésia mos tau ema sira nebe nudar "mata-mata" nee barak hatene portuges, dalaruma hatene liu tan ita. Neduni ita lalika bosok ita nian na tun sae.

 

Nusa mak wainhira ita hakarak foti no tau portuges nudar liafuan "oficial" ba ita nia rain, ita la dehan deit katak, ami hakarak tau portuges tamba ami nia liafuan Tetun nee seidauk bele atu tau hodi halao "administrasaun", hsst. Ami tau lai nia hodi hein ami nia Tetun nebe sei hadia no haburas hela. Ita lalika kait tun sae too buat ida "IDENTIDADE ho SÍMBOLO DE RESISTÊNCIA".

 

Ikus mai, hau ata habadak hodi dehan deit katak; ita tenke buka haketak buat ida "hanorin portuges ka buka hatene portuges" ho "portuges hanesan IDENTIDADE no SÍMBOLO de RESISTÊNCIA". Tuir mai, ema Timor oan bele buka hatene liafuan hot-hotu iha mundu nee tuir nia hakarak no bele, la iha ema dia atu hakaas ka taka dalan ba nia. Wainhira ema Timor oan barak mak hatene liafuan barak husi ema sel-seluk nian, nee sei diak liu tan ba itania rain Timor Lorosaae. Maibe atu hili no tau portuges ka liafuan seluk ema seluk nian nudar Ema no Rain Timor Lorosae nia IDENTIDADE no SÍMBOLO DE RESISTÊNCIA", diak liu hili no tau buat folin kultura nian nebe husi Timor Lorosae nian rasik, la bele foti tun sae ema seluk nian, hodi tau fali ba ita nian. Ita nudar Ema no Rain ida, ita iha buat nebe ita nian rasik atu bele foti no tau iha neba.

 

 

Hakuak boot ida

 

 

Lelobere

 

Marciano Silva <silvamarciano@yahoo.com> wrote:

Maun alin sira,

Ho laran ksolok tebes hau le ita nia maun alin
Lelobere nian nia lian fuan ka hanoin nebe hasai iha
forum loriku nee i hau fo parabens.